Thursday, October 31, 2013

اللحظة الاستثنائية

مهاب نصر
في الأيام الأولى ل"الثورة" كنت باتكلم في التليفون مع صديق مدرس من إسكندرية ٠ كان بيشتكي رغم السعادة من البهدلة اللي بقت فيها البلد وشوارعها ٠ قلت له بدون وعي والجلالة وأخداني : عادي جداً، دي ثورة يا٠٠٠٠ انت عايز تيجي السنة الجاية وتلاقي الموجّه داخل لك بيقول نفس الكلام وف إيدك نفس كراسة التحضير؟! سكت٠
الصديق ده كان من الإخوان اللي بيقولوا انا مش إخوان بس باحترامهم٠ معرفتي بيه ما تشككش في اخلاصة٠ ...لكن إخلاص ايه اللي ينط من فوق مستوى مرعب من الجهل بمعناه الإنساني الواسع٠ اقدر أقول بارتياح ان مستوى وعي المدرسين كان في مستوى الأطفال، والحكم اللي بيرددوها حكم الترابيع والمخدات ، كنت عايزهم يقبلوا ثورة تقولهم انتم مش مدرسين وأطلعوا برة؟! ما خدتش بالك ان المعنى الحقيقي للثورة ضدهم بالذات؟ أنا شبه متأكد ان صاحبي ده ما كانش إخوان إلا لأنهم بيأمنوا على مستوى وعيه الطفولي، أي فكرة تانية كانت أكبر بكتير من قدراته، وده مش حاله لوحده ده حال البلد كلها٠ عشان كدة الواحد كان معلق أمل في اللحظة الاستثنائية وأخلاقها، اللحظة اللي ممكن الدكتور يقول فيها انا ما كنتش دكتور والكاتب يقول انا ما كنتش كاتب، والثائر يقول انا ما كنتش ثائر٠٠٠٠ للأسف بلد زينا ما لهاش أمل إلا في النوع ده من اللحظات الاستثنائية ، غير كدة لما تيجي لعبة السياسة بتركب على وضع بدائي ما قبل السياسة وما قبل الكتابة وما قبل الوعي المسؤول٠ مش مشكلة ان عندنا استبداد المشكلة الأكبر انه تافه، مش مشكلة ان عندنا أحزاب دينية ، المشكلة أنهم شوية صيع بدقون، مش مشكلة ان رجال الأعمال احتكاريين المشكلة أنهم ورثة الحاج حمونّو بياع الشرابات ع الناصية٠ ودول قاعدين يعملوا دستور وتقاسم سلطة ٠٠ صلاة النبي أحسن٠
 
أنا كمان فكرت في اللحظة الاستثنائية دي .. اللي بعد ما نهزم السلطة كان لازم نعدها و نعترف اننا ولا حاجة .. و "اننا" دي تتضمن المتحدث، متعلمناش حاجة في المدارس والجامعات و بنشتغل بعنواين مش حقيقية...بنمثل الشغل..اقصى درجات الانحطاط و الفشل و الكدب في كل شئ حتى العواطف الانسانية...بس للاسف حالة الانكار مستمرة و عايشنها للنهاية ... يمكن اللحظة دي اللي ممكن تخلينا نتفق ان العيشة كده بقت خرا و اننا لو عاوزين نشوف بلد ربع نضيفة لازم نتفق على شوية حاجات..انما لأ لسة متفقين بس ازاي نطلع دين بعض

Wednesday, October 30, 2013

ست حكايات.. ست دول...عامل مشترك واحد


الصومال: عائشة إبراهيم دوهولو، 13 عاما، تم رجمها فى إستاد بمدينة كيسمايو بعد الحكم عليها بتهمة ممارسة الفاحشة.. الفاحشة فى هذا السياق أن أهل عائشة أبلغوا الشرطة أن هناك ثلاثة رجال أخطتفوا ابنتهم (عائشة) وتناوبوا إغتصابها، فقبضت عليها الشرطة وتم رجمها.. (!)

أفغانستان: صدِّيقة وخيّ
َام.. صدِّيقة كانت فى التاسعة عشر, هربت مع خيام الذى كان فى الخامسة والعشرون إلى خارج الحدود الأفغانية لأن أهلها كانوا يصرون على تزويجها قسرا.. عندما عادوا إلى أفغانستان, أحتجزتهم القوات الأفغانية وتم محاكماتهم أمام محكمة الملا وتم رجمهم سويا بتهمة ممارسة الرذيلة.. دون شهود, ودون أدلة, كده... (!)

العراق: دعاء خليل أسود, يزيدية الديانة, كانت فى السابعة عشر عندما تم رجمها بتهمة ممارسة الزنا مع رجل من قبيلة أخرى.. التشريح أظهر أنها ماتت عذراء.. انتشرت إشاعات غير صحيحة تناقلتها مواقع إسلامية بكونها قتلت بسبب تحولها إلى "الإسلام" إلى انتشار دعوات للانتقام لها، ما أدى إلى مجزرة الموصل 2007 وتفجيرات القحطانية التي أدت لمقتل وجرح أكثر من ألفي يزيدي....

إيران: سكينة محمدى أشتيانى, أم لإثنين, أرملة, أتهمت بممارسة علاقة غير شرعية مع أجنبى وتم الحكم عليها بالموت رجما فى 2006, وظلت فى السجن 5 سنوات تنتظر تنفيذ العقوبة.. بعد تصاعد حدة التظاهرات المناهضة لرجمها, وتوقيع عدد من العرائض لإيقاف رجمها, أهمهم العريضة التى وقَّعها الرئيس الفرنسى السابق جاك شيراك, إلى جانب منح اللجوء السياسى لسكينة من عدد من الدول, قررت السلطات الإيرانية وقف تنفيذ العقوبة بعد 5 سنوات من السجن و مئة جلدة...

السودان: إنتصار شريف عبد الله, 17 عاما, الحكم بالموت رجما بتهمة ممارسة الزنا مع إطلاق سراح الزانى.. (!)

السعودية: فتاة القطيف.. متزوجة.. كانت على علاقه قبل زواجها بشخص وقامت بإعطائه صورها، وبعد أن انهت علاقته به وتزوجت، قام الشخص الذي كانت على علاقه معه بتهديدها بصورها، مما جعلها تخبر زوجها، حيث طلب منها أن تجلب الصور منه، فذهبت في مارس 2006 وركبت معه في السيارة، وفي هذه الأثناء قام 7 شبان بالاشتباه فيهما والقيام بخطفهما والذهاب بهما منطقة مهجورة واغتصبوا الفتاة واحداً تلو الأخر، كما اغتصبوا الشخص الذي كان معها... المسخرة المبكية فى المسألة هى حكم المحكمة الذى قضى بسجن أربعة من المتهمين في قضية اغتصاب فتاة القطيف مدة "سنة واحدة مع 80 جلدة" وهي صدر بحقها 90 جلدة لأنها كانت في خلوة غير شرعية حسب وصف المحكمة... (!!)
 
ريم عمرو الدفراوي